Dream of Faemar

আহিনৰ সপোন

দিগন্ত বিয়াপি শ্যমলিমাই সাজিছে সাগৰ
কঁহুৱা ককায় 
মলয়াত জুৰ লৈ 
পলোৱাইছে ভাগৰ ৷

ভঁৰালৰ গাধৈত নাঙল আৰু যুঁৱলিয়ে ফুচ-ফুচাই পাতিছে কথা 
এয়া আমাৰ ঘামৰ ফচল ৷

কাতিৰ কুঁৱলীৰ আঁৰত গাভিনী হ'ব মোৰ পথাৰ ৷
গাখীৰতি ধানৰ দুগ্ধপান কৰিবলৈ 
নাহিবি অ' 
চকুচৰহা চৰহা পোক ৷
আকাশ বন্তিৰে পোৰিম তোক ৷
নাহিবি কাকতি ফৰিং,
পথাৰত পোতিম বাঁহৰ জেং
ফেঁচুৱে ভাঙবহি আহি 
তহঁতৰ ঠেঙ ৷

পোনাটোৰ হাফপেন্টটোৰ টিকাত দুটা ফুটা
বনিয়নত হেঙুনৰ কড়াল ৷
আখলত নিতে নাচে আকাল ৷
হৰি মহাজনৰ ধাৰৰ সূদে
কেঁকোৰাৰ দৰে মেলিছে পোৱালী 
নাদুকিৰ সপোন বোৰতো 
কাহানিবাই মাৰিলে নিতাল ৷

সেউজীয়াৰ অপাৰ সমুদ্ৰত 
মই সাঁতুৰিছো আৰু সাঁতুৰিছো ৷
 মেলি দিছো সপোনৰ বেহা 
শ্যামলিমাৰ সাগৰত 
বণিজ বেহাম প্ৰাপ্তিৰ ৷

পোনাটিলৈ এজোৰ গৰম কাপোৰ 
তাইলৈ গোন্ধ তেলৰ চিচা এটা
আৰু এটা হাত দীঘল বেলাউজ ৷

এইবাৰ এখন নতুন নিহালি সীয়াম 
মাঘৰ ৰাতিবোৰত 
নাদুকিৰ গাৰ উত্তাপ 
আৰু মোৰ হেপাহ বোৰত উম দি
পাৰ কৰিম এটা উজাগৰী 
নিশা ৷