প্ৰথম বৰষুণ

ধূলিয়ৰী শুকান পৃথিৱীৰ দুখত
গোটেই ৰাতি কান্দিলে আকাশে
বিয়পি পৰিল চকুপানী
বিৰিখৰ পাতত
কঁপালে বুকুৰ চৰাইৰ পোৱালী
এজাক সেমেকা বতাহে ৷

পকা পাত বোৰ সৰি পৰিল সংগোপনে
ধোৱাই দিলে সেউজীয়াবোৰ
প্ৰথম জাক বৰষুণে
পকা পাতৰ উচুপনি আৰু কোনে শুনে! ?

চালত বৰষুণ পিচলি পৰিছে পানীৰপচাত
মই মেলিদিছোঁ মলিয়ন হাত ৷
চাটক পক্ষী এটাৰ দৰে
তৃষ্ণাতুৰ জীৱন ৷
কাঁইটতহে পৰে ফুললৈ মেলা হাত ৷

মেঘবোৰে উচুপে কি বেদনাত
মেঘৰ কণ্ঠত কাৰ গভীৰ মাত?
গাজনীবোৰ যেন
আকাশৰ নোপোৱাৰ আৰ্তনাদ ৷

গাভৰু বিজুলীলৈ  মেঘৰ ভয়
জানোচা
দুষ্ট গাজনীয়ে তাইক আপোন কৰি লয় ৷

গ'লটো ৰাতি আকাশে কান্দিলে
লাগি ৰ'ল সেই চকুপানী
গছে-পাতে, ফুলে-কাঁইটে ৷

-বিকৃতাফু ২৫ জানুৱাৰী