এঠেঙীয়া বিতচকু

-


এঠেঙীয়া বিতচকু
তেজৰ তলত দুখ
শাওনৰ নৈৰ দৰে
হুমুনিয়াহৰ ঢল তলমল
সিপাৰৰ ঘাটতত
ৰান্ধনী বেলি যেন
তোৰ বিদায়ী মুখ ৷৷


শিতানত শিমলু তুলাৰ গাৰু
মন হে কমোৱা তুলা
বনাই থকা চিলনীৰ দৰে ৷
নাচাও বুলিলে তোৰ মুখ
স্মৃতিবোৰ মনৰ জপনা খুলি

সোমাই আহে বাৰে বাৰে ৷
বুকুৰ বেৰ চাই কটা খিৰিকিখন জপাই থ'লো
ক'ৰ পৰা জানো জলঙা সৰকি সুমাই আহে
জ্বলা মমৰ শেষ পোহৰ যেন

এধানি ৰ'দ ৷৷
স্মৃতি যেন সুস্বাদু চুইংগাম এটা
যেন চোবায়েই থাকিম তাৰ
ৰসহীন শাহ ৷
দুখৰ চৰাই এটাই কূটা কঢ়িয়াইছে অবিৰত

বুকুৰ বকুলত সাজিব তাৰ
প্ৰজন্মৰ বাবে বাহ ৷
পঢ়াৰ মেজত এঠেঙ ভঙা বিতচকু
পংগুত্ব সাৱটি পৰি আছে নিৰৱে
মই জপাই মেলিছো মনৰ চকু ৷৷
Location: Gogamukh, Assam, India

Comments

Post a Comment

Popular posts from this blog

-
Image
কাৰ বাবে কবিতা? শব্দৰ মহঙা দিনত কাৰ বাবে লিখিবি কবিতা ৷ কুশল বাৰ্তা বিনিময়ৰ বাবেও য'ত শব্দৰ দৈন্যতা ৷ শব্দ দৈন্যতাত মানুহ শব্দ দৈন্যতাত সমাজ শব্দ দৈন্যতাত পৃথিৱী ৷ আত্মকেন্দ্ৰিকতাৰ ইন্দ্ৰজালত বন্দী "আয়ৈ দেহী" বোলা এষাৰী সাদৰী মাত প্ৰসাৰিত সকলোৰে কেৱল উচ্চকাংক্ষাৰ  হাত মকৰাৰ দৰে জাল গুঁঠি লালসাৰ বুকুত বাসনাৰ পোৱালী আৰু কুৰুকি কুৰুকি খাই শেষ কৰে বুকুৰ মঙহ কোন তোৰ বুকুৰ বঙহ বিলাসী গাড়ীৰ ধূলিয়ে পোতি থৈ যায় পদপথৰ ভিক্ষুকৰ দেহ মাজ নিশা টোকৰ পৰে কোনোবা আন্ধাৰ গলিৰ বিশেষ জুপুৰিৰ দুৱাৰত য'ত ভোকে হাৰ মানে  কামনাই জয় কৰে শৰীৰ অৰ্থৰ বিনিময়ত ৷ অফিচৰ বিলাসী কোঠাৰ টেবুলে টেবুলে শতাংশৰ অংক চলে ৰজাই পাতে অংকৰ খেল বাহিৰত দূৰ্নীতি নিবাৰণৰ ফলক ওলমি ৰয় কোনোমতে সৰি নপৰা কৈ ৷ সকলোতে কমিচন ধন ঘটাই যেন জীৱনৰ "মিচন" পগলা ক'বি কি হ'ব লিখি প্ৰতিবাদী ৰামায়ণ ৷ শুনিছিলো - "দেশে দেশে দেশ আছে ৷" এই দেশত দলে পতি ভগৱান আছে ৷ কোনোবা যদি জাতিৰ পিতা কোনোবা আমদানিকৃত মাতা ৷ কোনোবাই দয়া কৰে দীনক পিছে জনতাই চটফটাই সহজাত ভোকত...
অধিক »

Udar Axomiya ( উদাৰ অসমীয়া)

-
উদাৰ অসমীয়া:         -বিনয় ৮ মাৰ্চ ২০১৭ অ-সম তুলনাবিহীন মোৰ দেশ অ-সমান ওখোৰা-মোখোৰা মোৰ দেশ নানা জাতি-বৰ্ণ- ধৰ্ম-ভাষা-দোৱানৰ সানমিহলি মোৰ দেশ তথাপিও সমান তথাপিও সকলোৰে বুকুত মৰমৰ টান জনাব জানে পৰস্পৰক  সন্মান অ-তুলনীয়, অ-সম মোৰ অসম দেশ হ'ব পাৰে সকলোৰে ভিন ভিন বেশ তথাপিও সৰ্বজন সমানহঃ মোৰ দেশ উদাৰ চিতে সৱটি সকলো ম'চি সকলোৰে চকুলো যুগে যুগে গাই সম্প্ৰীতিৰ  নামঘোষা, আজান,কেৰল, অইনিঃতম, বিহু, বাগৰুমবা, ঝুমইৰ… গাই একতাৰ বৃন্দগান বৈ আছে চিৰিলুইত চিৰ প্ৰৱাহমান ৷ আমি জানো কোন আপোন কোন পৰ আলহিকো এৰি দিওঁ নিজৰ ঘৰ ৷ অতিথি পৰায়ণ আমি নৰ আমাৰ নাৰায়ণ সেই বুলি খুৱাই দিব খোঁজোতে কামুৰিব খোজিলে আঙুলি আমিও জানো আমাৰো আছে কাণতলিয়াত দাঁত সৰুৱাব পৰা হাত ৷ অতিথি আৰু অঘৰী চিনি পাওঁ আমি মজিয়াত খাবলৈ দিলো বুলি ভঁৰাললৈ নেমেলিবি হাত ৷ জানো আমি কেতিয়া ল'ব লাগে চিটিপনি, মহ'ৰ টোকোন, হেংদান ৷ অসমীয়া এটা জাতিৰ নাম অসমীয়া এটা বৃন্দ গান কোনো ধৰ্মৰ নাম নহয় অসমীয়া উদাৰতা মানে নহয় সহনশীলতা কোমলতা-কঠোৰতা দুয়োটাই জানো আমি অঘৰীক বৰঘৰ এৰি নিজ...
অধিক »

বালিয়ে পোতা এখন গাঁৱৰ কথা। - বিনয় কৃষ্ণ তামুলী ফুকন "গেৰমে" ভূচিত্ৰাৱলীত নথকা এখন সৰু নৈ। নৈ বুলি ক'বলৈ বেয়াই লাগে। খৰালি কালত সাপৰ নেগুৰ যেন। কিছু সময়ত পানী নাথাকেই। পানী নথকা সময়ত পাৰৰ গঞাই নৈৰ বুকুত গাঁত খান্দি খোৱা পানী, গা পখলা পানী মানে দৈনন্দিন জীৱনৰ বাবে প্ৰয়োজনীয় পানী সংগ্ৰহ কৰে। নৈ খনৰ অৱস্থিতি অসম অৰুণাচল প্ৰদেশৰ ধেমাজি জিলা সীমান্তৱৰ্তী নলবাৰী গাঁও পঞ্চায়ত। নৈ খনৰ সংগম হৈছে গোগামুখৰ পৰা প্ৰায় ৪ কিলোমিটাৰ পূৱে বৈ থকা "ন-নদী" স'তে । কিন্তু বাৰিষাৰ কালছোৱাত নৈ খন অবাধ্য হয়। সাপৰ নেগুৰ যেন নৈ খনে কাল মূৰ্তি ধৰে। অৰুণাচলৰ পাহাৰত বৰষুণ দিলেই গেৰমে নৈ খন বিস্তাৰিত হয়। পাহাৰত গছ গছনি কাটি তহিলং কৰাৰ ফলত বালি আৰু বালি কঢ়িয়াই আনে গৰমেই । ফল ভোগে নামনিৰ গাঁও বোৰে। তেনে এখন গাঁৱৰ নাম ধেমাজি জিলাৰ বৰদলনি উন্নয়ন খণ্ডৰ নলবাৰী পঞ্চায়তৰ মানিকপুৰ গাঁও। বড়ো জনগোষ্ঠীৰ লোকৰ বসতি এই গাওঁ খনৰ অৱস্থা এতিয়া তথৈবচ। গাঁও খন চাবলৈ গৈ দেখিলো ঘৰবোৰ পোত গ'ল। বড়ো জনগোষ্ঠীয়ে চাং ঘৰ নাসাজে যদিও বানৰ পৰা বাচিবলৈ চাং ঘৰ সাজিছে। সেই চাং ঘৰবোৰো গেৰমেৰে নৈৰ বালিয়ে পোতি মাটিৰ ঘৰ যেন কৰিছে। মোৰ পৰিদৰ্শন কালত কেইজনমান বড়ো ডেকাই নাৱেৰে মূল পথত উঠিছে। গাঁও খন মই ২০০০ চনৰ পৰা দেখিছোঁ। তেতিয়া বালিয়ে পোতা পথাৰবোৰ শালিতলি আছিল। হঠাৎ এই বিপৰ্যয়ৰ কাৰণ গছ তহিলং কৰা। ঘৰে ঘৰে পৰ্টেল খুলি দায়বদ্ধতাৰ পৰিচয় দিয়া সকলে এইবোৰ ঢুকি পোৱাগৈ নাই। সেয়েহে সমস্যাটো মোৰ ফালৰ পৰাই উপস্থাপন কৰিলোঁ। মাণিকপুৰে বালিৰ তলতে কঁকবকাই থাকিব নে!?

-
Image
বালিয়ে পোতা এখন গাঁৱৰ কথা। - বিনয় কৃষ্ণ তামুলী ফুকন   "গেৰমে" ভূচিত্ৰাৱলীত নথকা এখন সৰু নৈ। নৈ বুলি ক'বলৈ বেয়াই লাগে। খৰালি কালত সাপৰ নেগুৰ যেন। কিছু সময়ত পানী নাথাকেই। পানী নথকা সময়ত পাৰৰ গঞাই নৈৰ বুকুত গাঁত খান্দি খোৱা পানী, গা পখলা পানী মানে দৈনন্দিন জীৱনৰ বাবে প্ৰয়োজনীয় পানী সংগ্ৰহ কৰে। নৈ খনৰ অৱস্থিতি অসম অৰুণাচল প্ৰদেশৰ ধেমাজি জিলা সীমান্তৱৰ্তী নলবাৰী গাঁও পঞ্চায়ত। নৈ খনৰ সংগম হৈছে গোগামুখৰ পৰা প্ৰায় ৪ কিলোমিটাৰ পূৱে বৈ থকা "ন-নদী" স'তে । কিন্তু বাৰিষাৰ কালছোৱাত নৈ খন অবাধ্য হয়। সাপৰ নেগুৰ যেন নৈ খনে কাল মূৰ্তি ধৰে। অৰুণাচলৰ পাহাৰত বৰষুণ দিলেই গেৰমে নৈ খন বিস্তাৰিত হয়। পাহাৰত গছ গছনি কাটি তহিলং কৰাৰ ফলত বালি আৰু বালি কঢ়িয়াই আনে গৰমেই । ফল ভোগে নামনিৰ গাঁও বোৰে। তেনে এখন গাঁৱৰ নাম ধেমাজি জিলাৰ বৰদলনি উন্নয়ন খণ্ডৰ নলবাৰী পঞ্চায়তৰ মানিকপুৰ গাঁও। বড়ো জনগোষ্ঠীৰ লোকৰ বসতি এই গাওঁ খনৰ অৱস্থা এতিয়া তথৈবচ। গাঁও খন চাবলৈ গৈ দেখিলো ঘৰবোৰ পোত গ'ল। বড়ো জনগোষ্ঠীয়ে চাং ঘৰ নাসাজে যদিও বানৰ পৰা বাচিবলৈ চাং ঘৰ সাজিছে। সেই চাং ঘৰবোৰো গেৰমেৰে নৈৰ বালি...
অধিক »