Wednesday, 1 February 2017


প্ৰাচীন চহৰ

ইয়াৰ প্ৰতিটো লাইট পষ্ট
অথবা ডাষ্টবিন
 মোৰ পৰিচিত ৷
গলি অথবা বাইলেন
এভিনিউ অথবা এপাৰ্টমেন্ট
চিনাকি মোৰ ৷
চিনাকী প্ৰাচীন গছবোৰ ৷

চিনাকি মুখ
চিনাকি মানুহ ৷

চিনাকি মোৰ চহৰ খনৰ ছন্দ,
কাৰণ প্ৰতিখন চহৰেৰে থাকে
একোটা ছন্দ
যিদৰে থাকে জীৱনৰ
যি দৰে চলি থাকে
হৃদস্পন্দন ছন্দোবদ্ধভাৱে
ধপ…ধপ…
ধপ…ধপ…

মই পৰ্যৱেক্ষক এই প্ৰাচীন চহৰৰ
প্ৰাচীন গছবোৰৰ দৰে ৷

সলনি হৈছে চহৰ খনৰ ছন্দ
ক্ৰমান্বয়ে বাঢ়ি আহিছে অচিনাকি মুখ
অচিনাকি গলি
অচিনাকি এপাৰ্টমেন্ট ৷

ছন্দপৰিবৰ্তিত চহৰ খনৰ
ছন্দ নিমিলা হৈছে
হৃদস্পন্দনৰ স'তে ৷

মই সন্ধান কৰিছো এখন নতুন চহৰৰ
 নতুন  কিন্তু প্ৰাচীন চহৰৰ ৷৷
(ছবি সংগৃহিত)

No comments:

Post a Comment