Tuesday, 24 January 2017


ফাগুন বিষাদৰ নাম 

যদিও পলাশ শিমলুৰ ফুলৰ ৰং মোৰ প্ৰিয়
প্ৰিয় নহয় মায়াৱী ফাগুন
ধূলিৰে ধূসৰ ফাগুনী পচোৱাই
ওখ শিমলুৰ পাহি নোৱাৰে কঁপাব
সৰুৱাই কেৱল জুই ফুল
ৰঙা কৰি বুকুৰ শিমলু তল ৷৷
মৌপিয়া, শালীকিৰ দেওদোপনিত
সৰি পৰে পলাশ পাপৰি
সৰা ফুলে ওপচাই বিষাদ
চকুলো সৰাই কোনোবা
উদাস কবিৰ ৷

প্ৰিয় ঋতু নহয় ফাগুন
জুই ফুলে ফাগুনত
উৰুৱাই শুকান ধূলি
ধূসৰ কৰে সুখময় পথ
আৰু বাজি থাকে
জুইৰঙী বিষাদ মালিতা
শোকৰ ভাটিয়ালী
বুকুৰ কোনোবা কোনত ৷৷

তথাপিও প্ৰতিটো ফাগুনত
বাট চাওঁ জুইৰঙা ফাগুনৰ
ৰঙা জুইৰে
লিখিবলে পলাশ শিমলু ৰঙী
ৰঙীন কবিতা ৷

No comments:

Post a Comment